మనస్ఫూర్తిగా నవ్వితే మనసుకే కాదు.. ఆరోగ్యానికీ మేలు జరుగుతుందని నిపుణులు చెబుతున్నారు. ఒత్తిడి తగ్గడం నుంచి మానసిక స్థితి మెరుగుపడటం వరకు నవ్వు ఎన్నో విధాలుగా ఉపయోగపడుతుందని పరిశోధనలు సూచిస్తున్నాయి. రోజూ కాసేపు నవ్వుతూ గడపడం అలవాటు చేసుకుంటే మానసిక ప్రశాంతతతో పాటు ఇతర ప్రయోజనాలు కూడా పొందవచ్చని నిపుణులు వివరిస్తున్నారు.

ఒత్తిడిని తగ్గించే నవ్వు
మనిషి ఒత్తిడికి గురైనప్పుడు శరీరంలో కార్టిసాల్‌ అనే హార్మోన్‌ స్థాయులు మారుతుంటాయి. నవ్వడం వల్ల ఒత్తిడికి సంబంధించిన శారీరక ప్రతిస్పందనలు తగ్గే అవకాశం ఉందని క్లినికల్‌ న్యూరోసైకాలజిస్ట్‌ జూడీ హో చెబుతున్నారు. ఒత్తిడితో కూడిన పనులు చేస్తున్నప్పుడు నవ్వినవారిలో గుండె వేగం తిరిగి సాధారణ స్థితికి చేరుకునే సమయంలో తక్కువగా ఉన్నట్లు కొన్ని అధ్యయనాలు గుర్తించాయి. నవ్వు ఒక్కటే అన్ని సమస్యలకు పరిష్కారం కాకపోయినా, ఒత్తిడిని ఎదుర్కొనేందుకు ఉపయోగపడుతుందని నిపుణులు వివరిస్తున్నారు.

మెదడుపై సానుకూల ప్రభావం
నవ్వినప్పుడు మెదడులో ఎండార్ఫిన్లు, డోపమైన్‌, సెరటోనిన్‌ వంటి రసాయనాలపై ప్రభావం పడవచ్చు. ఇవి సానుకూల భావనలకు సంబంధం కలిగి ఉంటాయి. దీనివల్ల మానసిక స్థితి మెరుగుపడే అవకాశం ఉంది. ముఖ కవళికలు భావోద్వేగాలపై ప్రభావం చూపుతాయనే సిద్ధాంతాన్ని ‘ఫేషియల్‌ ఫీడ్‌బ్యాక్‌ హైపోథెసిస్‌’ అంటారు. అంటే మన భావాలు ముఖంలో కనిపించడమే కాదు.. ముఖ కవళికలు కూడా మన భావాలపై ప్రభావం చూపవచ్చన్నమాట.

నవ్వుతో స్నేహబంధాలు బలోపేతం
నవ్వు ఇతరులతో సంబంధాలను మెరుగుపరచడంలోనూ ఉపయోగపడుతుంది. చిరునవ్వు ఎదుటివారిలో సానుకూల భావన కలిగించవచ్చు. అయితే, అన్ని సందర్భాల్లోనూ ఒకే రకమైన చిరునవ్వును అందరూ ఒకేలా అర్థం చేసుకోరు. అమెరికన్లు పెద్దగా నవ్వడాన్ని స్నేహపూర్వకంగా భావించే సందర్భాలు ఉండగా, తూర్పు ఆసియా దేశాల్లో కొందరు దాన్ని అతిగా స్పందిస్తున్నట్లుగా భావించవచ్చని స్టాన్‌ఫర్డ్‌ యూనివర్సిటీ ప్రొఫెసర్‌ జీన్‌ త్సాయ్‌ పరిశోధనలు సూచిస్తున్నాయి.

బలవంతపు నవ్వు వద్దు
నవ్వడం మంచిదే అయినా, ఎప్పుడూ నవ్వుతూ ఉండాలని ఇతరులపై ఒత్తిడి చేయడం సరికాదు. ముఖ్యంగా వర్క్‌ ప్లేస్‌లో బలవంతంగా నవ్వాలని కోరడం అసహనానికి దారితీయవచ్చు. మనస్ఫూర్తిగా, స్వచ్ఛందంగా నవ్వినప్పుడే దాని వల్ల ప్రయోజనం ఉంటుందని నిపుణులు చెబుతున్నారు. మానసిక సమస్యలకు చికిత్స తీసుకుంటున్నవారు నవ్వును అదనపు తోడ్పాటుగా భావించవచ్చు. అయితే, అది వైద్య చికిత్సకు ప్రత్యామ్నాయం కాదు.