- కదలికలు తగ్గితే కండరాల బలం, జీవక్రియలపై ప్రభావం పడొచ్చంటున్న వైద్యులు
- అధిక బరువు కనీసం 13 రకాల క్యాన్సర్ల ముప్పుతో సంబంధం కలిగి ఉందని వెల్లడి
- పెద్దపేగు, కాలేయం, రొమ్ము క్యాన్సర్లు ప్రమాదం ఉందంటున్న డాక్టర్లు
- పెద్దలు వారానికి 150-300 నిమిషాల మితమైన వ్యాయామం చేయాలని సూచన
- పని మధ్యలో లేచి నడవడం, సాగదీత వ్యాయామాలు చేయడం మంచిదని సలహా
రోజూ అరగంట వ్యాయామం చేస్తున్నారు.. మిగతా సమయమంతా ఆఫీసులో కుర్చీకి, ఇంట్లో సోఫాకు అతుక్కుపోతున్నారా? అయితే మీ ఆరోగ్యంపై మరోసారి దృష్టి పెట్టాల్సిన అవసరం ఉందని వైద్య నిపుణులు హెచ్చరిస్తున్నారు. రోజూ వ్యాయామం చేయడం మంచిదే అయినా, రోజులో ఎక్కువ గంటలు కదలకుండా కూర్చోవడం వల్ల కలిగే ప్రమాదాలను అది పూర్తిగా తొలగించలేదని చెబుతున్నారు. శారీరక శ్రమ లేకపోవడం, అధిక బరువు కలిసి జీవక్రియల్లో మార్పులకు దారితీయడంతో పాటు కొన్ని రకాల క్యాన్సర్ల ముప్పును పెంచవచ్చని వివరిస్తున్నారు.
ఎక్కువసేపు కదలకుండా ఉండటం వల్ల కండరాల బలం తగ్గడం, శరీర భంగిమ దెబ్బతినడం, రక్తంలో చక్కెర స్థాయుల నియంత్రణలో ఇబ్బందులు తలెత్తవచ్చని డాక్టర్లు తెలిపారు.
అధిక బరువుతో క్యాన్సర్‌ ముప్పు ఎలా?
శరీరంలో కొవ్వు కేవలం శక్తిని నిల్వ చేయడానికే పరిమితం కాదు. అది హార్మోన్లపై ప్రభావం చూపడంతో పాటు శరీరంలో ఇన్‌ఫ్లమేషన్‌ సంబంధిత ప్రక్రియలను ప్రేరేపించవచ్చు. అధిక కొవ్వు వల్ల ఇన్సులిన్‌ నిరోధకత పెరిగి, కణాల పెరుగుదలను ప్రభావితం చేసే మార్పులు చోటుచేసుకోవచ్చు. మెనోపాజ్‌ తర్వాత అధిక కొవ్వు కణజాలం నుంచి ఈస్ట్రోజెన్‌ ఎక్కువగా ఉత్పత్తి కావడం కూడా రొమ్ము, గర్భాశయ అంతర్గత పొర క్యాన్సర్ల ముప్పుతో సంబంధం కలిగి ఉంటుందని వైద్యులు చెబుతున్నారు.
అధిక శరీర బరువుకు కనీసం 13 రకాల క్యాన్సర్లతో సంబంధం ఉన్నట్లు పరిశోధనలు సూచిస్తున్నాయి. వీటిలో పెద్దపేగు, మూత్రపిండాలు, కాలేయం, క్లోమం, అండాశయాలు, థైరాయిడ్‌, రొమ్ము క్యాన్సర్లు ఉన్నాయి. అయితే అధిక బరువు ఉన్న ప్రతి ఒక్కరికీ క్యాన్సర్‌ వస్తుందని దీని అర్థం కాదని నిపుణులు స్పష్టం చేస్తున్నారు.
రోజంతా కదలిక ఉండాలి
పెద్దలకు వారానికి 150-300 నిమిషాల మితమైన వ్యాయామం లేదా 75-150 నిమిషాల తీవ్ర వ్యాయామం ఉపయోగకరమని వైద్యులు సూచిస్తున్నారు. వేగంగా నడవడం, సైక్లింగ్‌, ఈత వంటి కార్యకలాపాలు ఇందులో భాగం కావచ్చు. అయితే వ్యాయామ సమయంతో పాటు రోజంతా కదలికను కొనసాగించడం కూడా ముఖ్యమే.
ఎక్కువసేపు కూర్చొని పనిచేసేవారు మధ్యమధ్యలో లేచి నడవాలి. ఫోన్‌లో మాట్లాడేటప్పుడు నిలబడటం, వీలైతే మెట్లు ఎక్కడం, పని మధ్యలో సాగదీత వ్యాయామాలు చేయడం అలవాటు చేసుకోవాలి. గంటల తరబడి ఒకే చోట కూర్చోకుండా చిన్న విరామాలు తీసుకోవడం మంచిదని నిపుణులు సూచిస్తున్నారు.
పొగాకు వాడకాన్ని నివారించడం, మద్యానికి దూరంగా ఉండటం, పోషకాహారం తీసుకోవడం, ఆరోగ్యకరమైన బరువును కొనసాగించడం, వయసు, వ్యక్తిగత ముప్పును బట్టి క్యాన్సర్‌ స్క్రీనింగ్‌ చేయించుకోవడం కూడా నివారణలో భాగమే. ఒక్క అలవాటుతో క్యాన్సర్‌ను పూర్తిగా నివారించలేమని, అయితే రోజువారీ జీవనశైలిలో చిన్న మార్పులు ఆరోగ్యానికి మేలు చేస్తాయని వైద్యులు చెబుతున్నారు.
