- టపాసులు కాల్చడంలో మతపరమైన కోణం ఏముందని సుప్రీంకోర్టు ప్రశ్న
- దీపావళి టపాసులపై పూర్తి నిషేధానికి బదులు సమతుల్య విధానం అవసరమని స్పష్టీకరణ
- ప్రజారోగ్యం దృష్ట్యా స్వచ్ఛందంగా సురక్షిత పద్ధతులు పాటించాలని సూచన
- పంట వ్యర్థాల దహనంపైనా విచారణలో చర్చించిన ధర్మాసనం
ఢిల్లీ-ఎన్‌సీఆర్ ప్రాంతంలో తీవ్రమవుతున్న వాయు కాలుష్యంపై సుమోటోగా చేపట్టిన విచారణలో సుప్రీంకోర్టు కీలక వ్యాఖ్యలు చేసింది. దీపావళి పండుగ సందర్భంగా టపాసులు కాల్చడానికి, మతానికి సంబంధం ఏంటని ప్రశ్నించింది. పూర్తి నిషేధం విధించడం కంటే, ప్రజారోగ్యం, సంప్రదాయాల మధ్య సమతుల్యత పాటించడం ముఖ్యమని ధర్మాసనం అభిప్రాయపడింది.
ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్మల్య బాగ్చి, జస్టిస్ వి.మోహనాలతో కూడిన ధర్మాసనం ఈ విచారణ చేపట్టింది. గాలి కాలుష్యం వల్ల పిల్లలు, వృద్ధులు తీవ్ర అనారోగ్య సమస్యలు ఎదుర్కొంటున్నారని అమికస్ క్యూరీ అపరాజిత సింగ్ కోర్టు దృష్టికి తెచ్చారు. ఈ సమయంలో జస్టిస్ బాగ్చి జోక్యం చేసుకుంటూ “టపాసులు పేల్చడంలో మతపరమైన కోణం ఎక్కడ ఉంది?” అని సూటిగా ప్రశ్నించారు. దీనిపై అమికస్ క్యూరీ స్పందిస్తూ, తమ పేరుతో పిల్లలు అనారోగ్యానికి గురవుతున్నారని తెలిస్తే దేవుళ్లే ఆశ్చర్యపోతారని వ్యాఖ్యానించారు.
ఈ సందర్భంగా ప్రధాన న్యాయమూర్తి సూర్యకాంత్ మాట్లాడుతూ “మేము మతపరమైన మనోభావాలను దెబ్బతీయాలనుకోవడం లేదు. కానీ ప్రజలే స్వచ్ఛందంగా ముందుకు వచ్చి సురక్షిత పద్ధతులను ఎంచుకోవాలి. సమతుల్య విధానం అవసరం” అని అన్నారు. ప్రమాదకరమైన టపాసుల అమ్మకాలను నియంత్రించి, స్పార్క్లర్లు, దీపాలు వెలిగించే సంస్కృతిని ప్రోత్సహించాలని సూచించారు.
ఈ విచారణలో పంట వ్యర్థాల దహనం అంశం కూడా ప్రస్తావనకు వచ్చింది. రాష్ట్రాలు పంట వ్యర్థాలను కొనుగోలు చేసి, వాణిజ్యపరంగా ఉపయోగించుకునేందుకు ఒక మార్కెట్ వేదిక అవసరమని ధర్మాసనం పేర్కొంది. ఈ అంశంపై పూర్తి వివరాలతో అఫిడవిట్ దాఖలు చేస్తామని కేంద్రం తరఫున అదనపు సొలిసిటర్ జనరల్ ఐశ్వర్య భాటి తెలిపారు. అనంతరం, తదుపరి విచారణను ధర్మాసనం అక్టోబర్ 15కు వాయిదా వేసింది.
