- టైగర్ ష్రాఫ్‌పై దాడికి బాధ్యత తమదేనన్న లారెన్స్ బిష్ణోయ్ గ్యాంగ్
- ముందే హెచ్చరించినా వినలేదని, అందుకే దాడి చేశామని వెల్లడి
- సల్మాన్ ఖాన్‌తో పనిచేసే వారిని వదిలిపెట్టబోమని బహిరంగ హెచ్చరిక
- బిష్ణోయ్ సమాజానికి సల్మాన్ క్షమాపణ చెప్పాలని డిమాండ్
- ఈ ఘటనపై వెంటనే దర్యాప్తు చేయాలని సీఎం ఫడ్నవీస్ ఆదేశం
బాలీవుడ్‌లో మరోసారి గ్యాంగ్‌స్టర్ లారెన్స్ బిష్ణోయ్ గ్యాంగ్ కలకలం సృష్టించింది. ప్రముఖ నటుడు టైగర్ ష్రాఫ్‌పై ఆదివారం సాయంత్రం జరిగిన దాడికి తామే బాధ్యత వహిస్తున్నామని సంచలన ప్రకటన చేసింది. అంతేకాకుండా, బాలీవుడ్ కండల వీరుడు సల్మాన్ ఖాన్‌తో కలిసి పనిచేసే వారిని వదిలిపెట్టబోమని తీవ్రస్థాయిలో హెచ్చరించింది. ఈ ఘటన ముంబై సినీ వర్గాల్లో తీవ్ర ఆందోళన కలిగిస్తోంది.
ఈ మేరకు గ్యాంగ్ ప్రతినిధి అనిల్ పండిట్ ఒక సోషల్ మీడియా పోస్ట్‌లో బాధ్యతను ప్రకటించాడు. “జై మహాకాళ్… జై శ్రీరామ్… సోదరులందరికీ నమస్కారం. టైగర్ ష్రాఫ్ ఘటనకు మేం బాధ్యత వహిస్తున్నాం. అతనికి మేం ఫోన్ చేసి ముందే హెచ్చరించాం, కానీ అతను అర్థం చేసుకోలేదు. అందుకే ఈ రోజు మరింత గట్టిగా అర్థమయ్యేలా చేశాం. ముంబై ఫిల్మ్ ఇండస్ట్రీలో మా మాట వినని వారు, సల్మాన్ ఖాన్‌తో పనిచేసే వారు తర్వాతి లక్ష్యం అవుతారు. వేచి చూడండి” అని ఆ పోస్ట్‌లో హెచ్చరించారు. తమ పేరు వాడుకుని ప్రచారం పొందాలనుకునే ఇతర గ్రూపులను కూడా చంపేస్తామని వారు అందులో పేర్కొన్నారు.
మరోవైపు, ముంబై క్రైమ్ బ్రాంచ్ షేర్ చేసిన ఒక ఆడియోలో అనిల్ పండిట్ నేరుగా సల్మాన్ ఖాన్‌ను బెదిరించాడు. “సల్మాన్ ఖాన్, నేను చెప్పేది జాగ్రత్తగా విను. మా అన్న లారెన్స్ బిష్ణోయ్‌కు, బిష్ణోయ్ సమాజానికి క్షమాపణ చెప్పకపోతే, నీ ఇంట్లో కుక్కను కూడా వదిలిపెట్టం. నీ కుటుంబాన్ని మొత్తం నాశనం చేస్తాం. ఇది గుర్తుపెట్టుకో. నీకు సెక్యూరిటీ ఉందని, నీకేమీ కాదని అనుకోవద్దు” అని ఆ ఆడియోలో తీవ్రంగా హెచ్చరించాడు.
ఆదివారం సాయంత్రం ముంబైలోని జుహు ప్రాంతంలో మోటార్‌సైకిల్‌పై వచ్చిన ముగ్గురు దుండగులు టైగర్ ష్రాఫ్ కారుపై కాల్పులు జరిపారు. ఈ ఘటనలో టైగర్ ష్రాఫ్ సురక్షితంగా బయటపడగా, అతని డ్రైవర్‌కు గాయాలైనట్లు సమాచారం. ఈ ఘటనపై మహారాష్ట్ర ముఖ్యమంత్రి దేవేంద్ర ఫడ్నవీస్ స్పందించి, వెంటనే దర్యాప్తు చేసి నిందితులపై కఠిన చర్యలు తీసుకోవాలని పోలీస్ కమిషనర్‌ను ఆదేశించారు.
కాగా, 2024 ఏప్రిల్ 14న కూడా బాంద్రాలోని సల్మాన్ ఖాన్ గెలాక్సీ అపార్ట్‌మెంట్స్ వెలుపల ఇద్దరు వ్యక్తులు కాల్పులు జరిపిన విషయం తెలిసిందే. తాజా ఘటనతో బిష్ణోయ్ గ్యాంగ్ మరోసారి బాలీవుడ్‌ను టార్గెట్ చేయడం చర్చనీయాంశంగా మారింది.
