సోషల్ మీడియా వేదికలైన ఇన్‌స్టాగ్రామ్‌ వంటి వాటిలో బరువు తగ్గించే ఆహార ప్రణాళికలు, ఛాలెంజ్‌లు విస్తృతంగా ప్రచారంలో ఉంటున్నాయి. బరువు తగ్గేందుకు చాలా పద్ధతులు కేలరీలను తగ్గించడం లేదా కొన్ని ఆహార పదార్థాలకు దూరంగా ఉండడంపై దృష్టి పెడుతున్నాయి. అయితే, తాజాగా నిర్వహించిన ఓ అధ్యయనం ప్రకారం.. బరువు తగ్గించే క్రమబద్ధమైన కార్యక్రమంలో భాగంగా తీసుకుంటే, డైట్‌ సాఫ్ట్‌ డ్రింక్స్‌ కూడా నీటితో సమానమైన ఫలితాలను అందించే అవకాశం ఉంది. యూనివర్సిటీ ఆఫ్‌ లివర్‌పూల్‌ ప్రచురించిన ఈ అధ్యయనంలో, దీర్ఘకాలికంగా బరువు తగ్గేందుకు డైట్‌ సాఫ్ట్‌ డ్రింక్స్‌ దాదాపు నీటితో సమానమైన ఫలితాలను ఇచ్చినట్లు వెల్లడైంది. కేలరీలు లేని లేదా తక్కువ కేలరీలు కలిగిన స్వీటెనర్లతో తయారుచేసే పానీయాలపై ఇప్పటివరకు నిర్వహించిన పరిశోధనల్లో ఇది అత్యంత సుదీర్ఘమైన, సమగ్రమైన యాదృచ్ఛిక నియంత్రిత అధ్యయనంగా పేర్కొన్నారు.
ఎన్‌ఎన్‌ఎస్‌ లేదా డైట్‌ పానీయాలు..
నాన్‌ న్యూట్రిటివ్‌ స్వీటెనర్స్‌ (ఎన్‌ఎన్‌ఎస్‌) అనేవి చక్కెరకు ప్రత్యామ్నాయంగా పానీయాలు, ఆహార పదార్థాల్లో ఉపయోగించే తక్కువ లేదా సున్నా కేలరీల తీపి పదార్థాలు. 104 వారాల పాటు నిర్వహించిన క్లినికల్‌ ట్రయల్‌లో, దీర్ఘకాలిక బరువు నిర్వహణ కోసం ఎన్‌ఎన్‌ఎస్‌ పానీయాలు లేదా డైట్‌ పానీయాలు నీటితో సమానమైన ఫలితాలను అందించినట్లు వెల్లడైంది. ముఖ్యంగా అసిసల్ఫేమ్‌ పొటాషియం (అసిసల్ఫేమ్‌-కె), ఆస్పర్టేమ్‌, సుక్రలోజ్‌ వంటి స్వీటెనర్లు కలిగిన పానీయాలను పరిశీలించారు. ఈ పరిశోధన బ్రిటిష్‌ జర్నల్‌ ఆఫ్‌ న్యూట్రిషన్ లో ప్రచురితమైంది. అధిక బరువు లేదా ఊబకాయ సమస్యలు ఎదుర్కొంటున్న 493 మంది పెద్దలు ఈ పరిశోధనలో పాల్గొన్నారు. వీరికి క్రమబద్ధమైన ప్రవర్తనా ఆధారిత బరువు నిర్వహణ కార్యక్రమాన్ని అమలు చేశారు. యాదృచ్ఛిక పద్ధతిలో పాల్గొన్నవారిని రెండు బృందాలుగా విభజించి, ఒక బృందానికి రోజూ నీరు, మరో బృందానికి మార్కెట్లో అందుబాటులో ఉన్న డైట్‌ పానీయాలను అందించారు. ఈ పానీయాల్లో ఉపయోగించిన స్వీటెనర్ల పరిమాణం యూరోపియన్‌ ఫుడ్‌ సేఫ్టీ అథారిటీ (ఈఎఫ్‌ఎస్‌ఏ) నిర్దేశించిన భద్రతా పరిమితులకు లోబడి ఉంది.
మెరుగ్గా ఫలితాలు..
ప్రతిరోజూ డైట్‌ పానీయాలు తీసుకున్నవారు, నీరు తాగినవారితో పోలిస్తే దాదాపు సమానంగా బరువు తగ్గినట్లు పరిశోధకులు గుర్తించారు. రెండు బృందాల్లోనూ శరీర కూర్పు, నడుము చుట్టుకొలత, పలు జీవక్రియలకు సంబంధించిన కొలమానాల్లో మెరుగుదల కనిపించింది. ఎన్‌ఎన్‌ఎస్‌ పానీయాలు దీర్ఘకాలంలో జీవక్రియకు హాని కలిగిస్తాయని లేదా ఆకలిపై ప్రతికూల ప్రభావం చూపుతాయని చెప్పే వాదనలకు ఈ ఫలితాలు మద్దతు ఇవ్వడం లేదని అధ్యయనం పేర్కొంది. యూనివర్సిటీ ఆఫ్‌ లివర్‌పూల్‌లో సైకాలజీ విభాగం డీన్‌ ప్రొఫెసర్‌ జోఆన్‌ హారోల్డ్‌ మాట్లాడుతూ, స్వీటెనర్లు ఆకలిని నియంత్రించే విధానాన్ని దెబ్బతీస్తాయని లేదా బరువు పెరగడానికి కారణమవుతాయని వ్యక్తమవుతున్న ఆందోళనలకు కఠినమైన, దీర్ఘకాలిక యాదృచ్ఛిక నియంత్రిత అధ్యయనంలో మద్దతు లభించలేదని తెలిపారు.
డబ్ల్యూహెచ్‌ఓ మార్గదర్శకాలకు భిన్నం..
ఈ అధ్యయన ఫలితాలు ప్రపంచ ఆరోగ్య సంస్థ (డబ్ల్యూహెచ్‌ఓ) 2023లో జారీ చేసిన మార్గదర్శకాలకు భిన్నంగా ఉన్నాయి. బరువు నియంత్రణ కోసం చక్కెర రహిత స్వీటెనర్లను ఉపయోగించవద్దని అప్పట్లో డబ్ల్యూహెచ్‌ఓ సూచించింది. వీటిని దీర్ఘకాలం వినియోగించడం వల్ల కొన్ని ప్రతికూల ఆరోగ్య ప్రభావాలు ఎదురయ్యే అవకాశం ఉందని కూడా హెచ్చరించింది. ముఖ్యంగా పెద్దల్లో టైప్‌-2 మధుమేహం, హృదయ సంబంధిత వ్యాధుల ముప్పు పెరిగే అవకాశం ఉందని పేర్కొంది. అయితే, యూనివర్సిటీ ఆఫ్‌ లివర్‌పూల్‌ నిర్వహించిన ఈ కొత్త అధ్యయనానికి అమెరికన్‌ బెవరేజ్‌ అసోసియేషన్‌ నిధులు సమకూర్చింది. పరిశోధన ఫలితాల విశ్లేషణ, నివేదిక రూపకల్పనపై పరిశోధకులకు పూర్తి నియంత్రణ ఉన్నట్లు వెల్లడించారు.
ముఖ్య గమనిక: ఈ అధ్యయనం ప్రకారం, క్రమబద్ధమైన బరువు తగ్గింపు కార్యక్రమంలో డైట్‌ పానీయాలు నీటికి ప్రత్యామ్నాయంగా పనిచేస్తాయ‌ని తేలింది. అయితే, దీనివల్ల ప్రతి ఒక్కరికీ ఒకే విధమైన ఫలితాలు వస్తాయని భావించకూడదు. అలాగే, ఈ ఒక్క అధ్యయనం ఆధారంగా డైట్‌ పానీయాలు దీర్ఘకాలికంగా పూర్తిగా సురక్షితమైనవని నిర్ధారించలేం.
