గోదావరి జిల్లాలకు మహర్దశ.. భారీ పెట్టుబడులపై మంత్రి లోకేశ్ హర్షం

ఆంధ్రప్రదేశ్ రాష్ట్రానికి పెట్టుబడులను ఆకర్షించడమే లక్ష్యంగా కాకినాడలో నిర్వహించిన భారత పరిశ్రమల సమాఖ్య (సీఐఐ) ప్రాంతీయ సదస్సు విజయవంతమైంది. ఈ సదస్సు ద్వారా రాష్ట్రానికి రూ.4,256 కోట్ల విలువైన పెట్టుబడి ప్రతిపాదనలు వచ్చినట్లు ఐటీ, పరిశ్రమల శాఖ మంత్రి నారా లోకేశ్ ప్రకటించారు. ఈ పెట్టుబడుల ద్వారా రాష్ట్రవ్యాప్తంగా 14,000కు పైగా కొత్త ఉద్యోగ అవకాశాలు లభిస్తాయని ఆయన వెల్లడించారు.

సోమవారం ‘ఎక్స్’ (ట్విట్టర్) వేదికగా మంత్రి లోకేశ్ ఈ వివరాలను వెల్లడించారు. కాకినాడ సదస్సు భారీగా పెట్టుబడులను ఆకర్షించడం పట్ల ఆయన హర్షం వ్యక్తం చేశారు. బ్లూ ఎకానమీ (సాగర ఆధారిత ఆర్థిక వ్యవస్థ), ఎంఎస్‌ఎంఈ రంగాల్లో గోదావరి జిల్లాలు రాష్ట్రానికి దిశానిర్దేశం చేయడానికి సిద్ధంగా ఉన్నాయని ఆయన పేర్కొన్నారు. “చూజ్ స్పీడ్, చూజ్ ఏపీ” నినాదంతో పెట్టుబడిదారులకు స్పష్టమైన సందేశం ఇస్తున్నామని, వేగవంతమైన అనుమతులతో వారికి ప్రభుత్వం పూర్తిస్థాయిలో అండగా నిలుస్తుందని లోకేశ్ స్పష్టం చేశారు.