వెన్నునొప్పి అనేది ఎముకలు, కీళ్ల వైద్యులు తరచూ ప‌రిష్క‌రించే సమస్యల్లో ఒకటి. అయితే ఈ నొప్పికి కారణం అందరిలో ఒకేలా ఉండదు. వెన్నెముకలోని డిస్కులకు సంబంధించిన సమస్యలు, వయసు పెరిగే కొద్దీ వచ్చే మార్పులు, శారీరక శ్రమ లేదా క్రీడల సమయంలో కండరాలు పట్టేయడం, కండరాలు బలహీనంగా ఉండడం, సరైన భంగిమలో కూర్చోకపోవడం వంటి అనేక అంశాలు వెన్నునొప్పికి కారణం అవుతాయి. కొందరిలో ఒకటి కంటే ఎక్కువ కారణాలు కూడా కలిసి ఉండే వీలు ఉంటుంది.
కండరాల ప‌నితీరు ఎలా ఉంటుంది..
శరీరంలోని పొత్తికడుపు కండరాలు, వెన్ను కండరాలు, కటి ప్రాంతంలోని కండరాలు, శ్వాసకు తోడ్పడే డయాఫ్రాగమ్‌ వంటి కండరాల సమూహాన్ని కోర్‌ కండరాలు అంటారు. ఇవి వెన్నెముకకు ఆధారంగా నిలుస్తూ శరీరానికి స్థిరత్వాన్ని అందిస్తాయి. ఈ కండరాలు బలహీనంగా ఉన్నప్పుడు కూర్చున్న స్థానం నుంచి లేవడం, నేలపై ఉన్న వస్తువులను ఎత్తడం, శరీరాన్ని తిప్పడం, ఎక్కువసేపు కూర్చోవడం, నిలబడడం లేదా నడవడం వంటి సాధారణ పనులు కూడా ఇబ్బందిగా మారతాయి. ముఖ్యంగా ముందుకు వంగి వస్తువులను ఎత్తేటప్పుడు నొప్పి పెరిగే అవకాశం ఉంటుంది. కండరాల్లో తగినంత బలం, శక్తి లేకపోతే గాయాల ప్రమాదం కూడా పెరుగుతుంది.
వెన్ను నొప్పి ఎలా త‌గ్గుతుంది..
వెన్నునొప్పికి అసలు కారణం ఏమిటో గుర్తించడం కొన్నిసార్లు వైద్య పరీక్షలు, స్కానింగ్‌ చేసిన తర్వాత కూడా కష్టంగా ఉంటుంది. ఎందుకంటే ఈ సమస్యకు ఒకటి కంటే ఎక్కువ కారణాలు ఉంటాయి. అయితే కోర్‌ కండరాలను బలోపేతం చేయడం వల్ల చాలామందిలో వెన్నునొప్పి తగ్గుతుందని వైద్య నిపుణులు చెబుతున్నారు. దీనికోసం వ్యక్తి ఆరోగ్య పరిస్థితి, నొప్పి తీవ్రత, కండరాల బలాన్ని పరిశీలించి తగిన వ్యాయామ ప్రణాళిక రూపొందించుకోవాలి. మాడిఫైడ్‌ ప్లాంక్స్‌, బ్రిడ్జెస్‌, అబ్డామినల్‌ బ్రేసింగ్‌ వంటి వ్యాయామాలు కోర్‌ కండరాల బలాన్ని పెంచేందుకు ఉపయోగపడతాయి. అయితే ఏ వ్యాయామం చేయాలి, ఎంత తీవ్రతతో చేయాలి అనేది వ్యక్తి పరిస్థితిని బట్టి నిర్ణయించాలి.
జాగ్ర‌త్త‌లు త‌ప్ప‌నిస‌రి..
వ్యాయామాలతోపాటు కూర్చునే, నిలబడే భంగిమను సరిచేసుకోవడం కూడా ముఖ్యం. వస్తువులను ఎత్తేటప్పుడు సరైన పద్ధతిని పాటించడం, వెన్నుపై అనవసరమైన ఒత్తిడి పడకుండా చూసుకోవడం, రోజువారీ పనుల్లో అవసరమైన మార్పులు చేసుకోవడం వల్ల నొప్పిని నియంత్రించవచ్చు. కోర్‌ కండరాల బలహీనత ఒక్కటే వెన్నునొప్పికి కారణం కాద‌ని గుర్తుంచుకోవాలి. ప్రతి ఒక్కరిలో నొప్పికి దారితీసే అంశాలు వేర్వేరుగా ఉంటాయి. కాబట్టి వైద్య పరీక్షల ఆధారంగా కారణాన్ని గుర్తించి, తగిన వ్యాయామాలు, భంగిమలో మార్పులు, జాగ్రత్తలతో సమస్యను నిర్వహించుకోవడం అవసరమ‌ని నిపుణులు సూచిస్తున్నారు.
