భారీ అంచనాల మధ్య విడుదలై మంచి టాక్ తెచ్చుకున్న ‘రామాయణ’ చిత్రంపై సూపర్ స్టార్ మహేశ్‌ బాబు ప్రశంసల వర్షం కురిపించారు. రణ్‌బీర్ కపూర్, సాయిపల్లవి, యశ్ ప్రధాన పాత్రల్లో, నితీశ్ తివారీ దర్శకత్వంలో తెరకెక్కిన ఈ సినిమాను చూసిన అనంతరం ఆయన సోషల్ మీడియా వేదికగా తన అభిప్రాయాన్ని పంచుకున్నారు. చిత్రంలోని నటీనటుల అభినయాన్ని, దర్శకుడి ప్రతిభను ఆయన ప్రత్యేకంగా కొనియాడారు.

“చిన్నప్పటి నుంచి మనం వింటూ పెరిగిన కథలు వెండితెరపై ఇంత అద్భుతంగా ప్రాణం పోసుకోవడం చూడటం నాకు ఎంతో ఆనందాన్ని ఇస్తోంది. రణ్‌బీర్ కపూర్, యశ్, సాయిపల్లవిల అభినయం మ్యాజికల్. నమిత్ మల్హోత్రా, నితీశ్ తివారీ.. మీకు హ్యాట్సాఫ్. ఇంత భారీ స్కేల్‌లో సినిమాను రూపొందించడంలో మీ శ్రమ ప్రశంసనీయం. ‘రామాయణ’ మొత్తం చిత్ర బృందానికి అభినందనలు” అని మహేశ్‌ బాబు తన పోస్ట్‌లో పేర్కొన్నారు.

నిన్న‌ విడుదలైన ఈ పౌరాణిక చిత్రంపై ఇప్పటికే ఎస్.ఎస్. రాజమౌళి, అట్లీ వంటి ప్రముఖ దర్శకులు ప్రశంసలు కురిపించారు. తాజాగా మహేశ్‌ బాబు కూడా ఈ జాబితాలో చేరారు. అయితే, మహేశ్‌ చేసిన ఈ పోస్ట్‌తో మరో ఆసక్తికరమైన చర్చ మొదలైంది. ప్రస్తుతం ఆయన రాజమౌళి దర్శకత్వంలో ‘వారణాసి’ అనే చిత్రంలో నటిస్తున్నారు. సోషియో ఫాంటసీ, టైమ్ ట్రావెల్ నేపథ్యంలో సాగే ఈ సినిమాలో ‘రామాయణం’కు సంబంధించిన ఎపిసోడ్ అత్యంత కీలకమని ప్రచారం జరుగుతోంది.

ఈ చిత్రంలో దాదాపు 20 నిమిషాల పాటు సాగే ఓ సీక్వెన్స్‌లో మహేశ్‌ బాబు శ్రీరాముడి పాత్రలో కనిపించనున్నారని వార్తలు వస్తున్నాయి. ఇప్పుడు ‘రామాయణ’ చిత్రంలో రాముడిగా రణ్‌బీర్ కపూర్ నటనకు మంచి మార్కులు పడుతున్న తరుణంలో అదే ఐకానిక్ పాత్రలో మహేశ్‌ ఎలా కనిపిస్తారో, ఎలా మెప్పిస్తారో అనే అంశంపై అభిమానుల్లో, సినీ వర్గాల్లో ఆసక్తికరమైన చర్చ మొదలైంది. మహేశ్‌ ప్రశంసల పోస్ట్, ఆయన చేస్తున్న పాత్రపై అంచనాలను మరింత పెంచింది.