లాస్ ఏంజిల్స్ మేయర్‌గా భారత సంతతి మహిళ.. మన వ్యవస్థపై శశి థరూర్ వ్యాఖ్యలు

అమెరికాలోని ప్రఖ్యాత నగరం లాస్ ఏంజెలెస్ మేయర్‌గా భారత సంతతికి చెందిన నిత్యా రామన్ ఎన్నికై చరిత్ర సృష్టించారు. ఈ పదవిని చేపట్టిన తొలి భారతీయ-అమెరికన్‌గా, తొలి దక్షిణాసియా వ్యక్తిగా ఆమె రికార్డు సృష్టించారు. ఈ చారిత్రాత్మక విజయంపై కాంగ్రెస్ సీనియర్ నేత, ఎంపీ శశి థరూర్ స్పందించారు. నిత్యా రామన్‌కు అభినందనలు తెలుపుతూనే, భారత నగరాల్లో మేయర్లకు ఉన్న పరిమిత అధికారాలపై కీలక వ్యాఖ్యలు చేశారు.

“తిరువనంతపురం బిడ్డ నిత్యా రామన్ లాస్ ఏంజెలెస్ నూతన మేయర్ అయ్యారు” అని థరూర్ ట్వీట్ చేశారు. “అమెరికాలోని మేయర్లతో పోలిస్తే, భారత్‌లోని మేయర్లు మెరుగైన పనితీరు కనబరచలేకపోతున్నారు. బ్రిటిష్ కాలం నాటి వ్యవస్థ కారణంగా ఇక్కడి మేయర్లకు సరైన అధికారాలు, బడ్జెట్ నియంత్రణ ఉండటం లేదు. దీంతో వారు నగరాలను సమర్థవంతంగా పాలించలేకపోతున్నారు” అని ఆయన విమర్శించారు. మన దేశంలో మున్సిపల్ కమిషనర్‌గా నియమితులైన బ్యూరోక్రాట్ల చేతిలోనే వాస్తవ అధికారాలు ఉంటాయని ఆయన అభిప్రాయపడ్డారు.

ఇటీవల జరిగిన ఎన్నికల్లో నిత్యా రామన్ 52.70% ఓట్లు సాధించి, తన సమీప ప్రత్యర్థి, ప్రస్తుత మేయర్ కరెన్ బాస్‌పై (47.30%) విజయం సాధించారు. తన ఓటమిని అంగీకరించిన కరెన్ బాస్, నిత్యాకు ఫోన్ చేసి శుభాకాంక్షలు తెలిపారు. “లాస్ ఏంజిల్స్ తదుపరి మేయర్‌గా ఎన్నికవడం చాలా గౌరవంగా భావిస్తున్నాను” అని నిత్యా రామన్ పేర్కొన్నారు.

భారత్‌లో పుట్టిన నిత్యా రామన్, ఆరేళ్ల వయసులో కుటుంబంతో కలిసి అమెరికాకు వలస వెళ్లారు. హార్వర్డ్ యూనివర్సిటీ, మసాచుసెట్స్ ఇన్‌స్టిట్యూట్ ఆఫ్ టెక్నాలజీ (MIT)లలో ఉన్నత విద్యను అభ్యసించారు. 2020లో తొలిసారి లాస్ ఏంజిల్స్ సిటీ కౌన్సిల్‌కు ఎన్నికైన ఆమె, గృహ వసతి, నిరాశ్రయుల సమస్య, పౌర సేవల మెరుగుదల వంటి అంశాలను తన ప్రచారంలో ప్రధానంగా ప్రస్తావించారు.