రాజస్థాన్ రాజధాని జైపూర్‌లో నిబంధనలకు విరుద్ధంగా విదేశీయులకు ఆశ్రయం కల్పించిన ఒక హోటల్‌పై కేసు నమోదైంది. చిత్రకూట్ ప్రాంతంలోని ‘ఎల్లోరా’ హోటల్ నిర్వాహకులు ఈ నిబంధనల ఉల్లంఘనకు పాల్పడినట్లు అధికారులు గుర్తించారు. సరైన ధ్రువపత్రాలు లేని ఇద్దరు థాయ్‌లాండ్ మహిళలకు బస కల్పించినందుకు గానూ హోటల్ మేనేజర్‌పై పోలీసులు కేసు నమోదు చేశారు.

ఫారెనర్స్ రీజినల్ రిజిస్ట్రేషన్ ఆఫీస్ అధికారులు నిర్వహించిన తనిఖీల్లో ఈ వ్యవహారం వెలుగులోకి వచ్చింది. వీసా గడువు ముగిసినప్పటికీ, ఒక థాయ్‌లాండ్ మహిళ అక్టోబర్ 19 నుంచి సదరు హోటల్‌లోనే బస చేస్తోంది. ఈ విషయంపై హోటల్ మేనేజర్ విపిన్ మహేశ్వరి పోలీసులకు ఎటువంటి సమాచారం అందించలేదు. విదేశీయులు బస చేసినప్పుడు నిబంధనల ప్రకారం తప్పనిసరిగా సమర్పించాల్సిన ‘సి-ఫారం’ను కూడా ఆన్‌లైన్‌లో దాఖలు చేయలేదు. దీంతో అధికారులు ఆ మహిళను అదుపులోకి తీసుకున్నారు.

ఇదే హోటల్‌లో గతంలో బస చేసిన మరో థాయ్ మహిళ సవాయ్ మాన్ సింగ్ ఆసుపత్రిలో చికిత్స పొందుతూ మరణించడం ఈ కేసులో మరో కీలక అంశంగా మారింది. ఆమె కూడా వీసా గడువు ముగిసినప్పటికీ తన గుర్తింపును దాచిపెట్టి అక్కడే ఉన్నట్లు ఆరోపణలు ఉన్నాయి. ఆమె విషయంలోనూ హోటల్ యాజమాన్యం ‘సి-ఫారం’ దాఖలు చేయలేదని తేలింది. ఇటీవల బహిష్కరణకు గురైన మరో విదేశీయురాలి పాస్‌పోర్ట్ ఆధారంగా గది కేటాయించినట్లు ప్రాథమిక విచారణలో వెల్లడి కావడంతో, పోలీసులు ఆ కోణంలోనూ దర్యాప్తును ముమ్మరం చేశారు.

ఈ ఘటనల నేపథ్యంలో హోటల్ నిర్వాహకుడిపై ఇమ్మిగ్రేషన్ అండ్ ఫారినర్స్ యాక్ట్, 2025 కింద చిత్రకూట్ పోలీస్ స్టేషన్‌లో కేసు నమోదైంది. ఈ వ్యవహారంతో అప్రమత్తమైన ఎఫ్‌ఆర్‌ఆర్‌ఓ అధికారులు జైపూర్‌లోని అన్ని హోటళ్లు, గెస్ట్‌హౌస్‌లకు కఠిన హెచ్చరికలు జారీ చేశారు. విదేశీయులకు గదులు కేటాయించే ముందు వారి అసలు పాస్‌పోర్ట్, వీసాలను తప్పనిసరిగా తనిఖీ చేయాలని, నిర్ణీత గడువులోగా ‘సి-ఫారం’ సమర్పించాలని ఆదేశించారు. నిబంధనలు అతిక్రమిస్తే కఠిన చర్యలు తప్పవని స్పష్టం చేశారు.