హైదరాబాద్ (మెట్రో న్యూస్):
కమిషనర్ల అభ్యంతరాలపై విచారణ జరపాలి
మంత్రి కెప్టెన్ ఎన్. ఉత్తమ్ కుమార్ రెడ్డి
ఎన్నికల పోరులో అన్ని రాజకీయ పార్టీలూ ఆటగాళ్లయితే… ఎన్నికల సంఘం రిఫరీ. ఆ రిఫరీపైనే అనుమానం తలెత్తితే ఓడిపోయేది ఏదో ఒక రాజకీయ పార్టీ కాదు—మొత్తం ప్రజాస్వామ్యమేనని రాష్ట్ర నీటిపారుదల, పౌర సరఫరాల శాఖ మంత్రి కెప్టెన్ ఎన్. ఉత్తమ్ కుమార్ రెడ్డి హెచ్చరించారు. భారత ఎన్నికల సంఘం పనితీరుపై తాజాగా వెలుగులోకి వచ్చిన అంశాలు ఓటు విలువను గుర్తించే ప్రతి భారతీయుడినీ కలవరపరుస్తున్నాయని అన్నారు. స్వతంత్ర ఎన్నికల సంఘం అనేది అధికారంలో ఉన్న ప్రభుత్వం ప్రజలకు ఇచ్చే దయాదాక్షిణ్యం కాదని, రాజ్యాంగం ప్రజలకు కల్పించిన రక్షణ కవచమని స్పష్టం చేశారు. ఆ సంస్థ స్వతంత్రంగా పనిచేస్తోందా లేదా అనే తీవ్రమైన ప్రశ్నలు తలెత్తినప్పుడు కేంద్ర ప్రభుత్వం, ఎన్నికల సంఘం దేశ ప్రజలకు స్పష్టమైన సమాధానాలు చెప్పాలని డిమాండ్ చేశారు.
“రాజ్యాంగ పదవికి గౌరవం కుర్చీ వల్ల రాదు… ప్రజల విశ్వాసం వల్ల వస్తుంది. ఆ విశ్వాసమే తీవ్రంగా దెబ్బతిన్నప్పుడు బాధ్యత వహించాల్సిందే. ప్రధాన ఎన్నికల కమిషనర్ జ్ఞానేశ్ కుమార్ తన పదవికి రాజీనామా చేయాలి. వెలుగులోకి వచ్చిన అంశాలన్నింటిపై స్వతంత్రంగా, నిష్పాక్షికంగా విచారణ జరగాలి” అని ఉత్తమ్ కుమార్ రెడ్డి స్పష్టం చేశారు.
“ప్రశ్నలకు సమాధానాలు చెప్పకుండా ఎన్నికల ప్రక్రియను నమ్మమని ప్రజలను ఆదేశించలేరు. ఎన్నికల సంఘం బీజేపీ చేతిలోని పరికరం కాదు. ఓటరు జాబితా కేంద్ర ప్రభుత్వ ఆస్తి కాదు. ఓటు అధికార పార్టీ సొత్తు అసలే కాదు. ఓటు ఈ దేశ ప్రజల హక్కు… ఆ హక్కును కాపాడటం రాజ్యాంగ వ్యవస్థల బాధ్యత” అని ఆయన తేల్చిచెప్పారు.
