ప్రజల ఆరోగ్యంతో చెలగాటమాడుతున్న కల్తీ పాల దందాను మహేశ్వరం జోన్ ఎస్‌వోటీ పోలీసులు బట్టబయలు చేశారు. రంగారెడ్డి జిల్లా ఇబ్రహీంపట్నం మండలం పోచారం గ్రామంలోని ఓ ఇంట్లో నిర్వహిస్తున్న కల్తీ పాల తయారీ కేంద్రంపై నిన్న రాత్రి పోలీసులు దాడి చేశారు. ఈ ఘటనలో ఒకరిని అరెస్ట్ చేసి, భారీగా కల్తీ పాలను స్వాధీనం చేసుకున్నారు.

పోచారం గ్రామానికి చెందిన ఆండే శ్రీశైలం (43) అనే వ్యక్తి తన ఇంట్లోనే రహస్యంగా ఈ కేంద్రాన్ని నడుపుతున్నాడు. పాల పొడిలో నీళ్లు, ప్రమాదకరమైన రసాయనమైన హైడ్రోజన్ పెరాక్సైడ్‌ను కలిపి సింథటిక్ పాలను తయారు చేస్తున్నట్లు పోలీసుల దర్యాప్తులో వెల్లడైంది. పక్కా సమాచారం అందుకున్న ఎస్‌వోటీ బృందం మెరుపుదాడి చేసి నిందితుడిని అదుపులోకి తీసుకుంది.

ఘటనా స్థలం నుంచి 100 లీటర్ల కల్తీ పాలు, 35 కిలోల ‘ధోల్‌పూర్’ బ్రాండ్ పాలపొడి, ఒక లీటరు హైడ్రోజన్ పెరాక్సైడ్ రసాయనాన్ని పోలీసులు స్వాధీనం చేసుకున్నారు. నిందితుడు ఈ కల్తీ పాలను హైదరాబాద్‌ నగరంలోని వినియోగదారులకు సరఫరా చేస్తున్నట్లు ప్రాథమిక విచారణలో తేలింది. శ్రీశైలంపై కేసు నమోదు చేసి, ఇబ్రహీంపట్నం పోలీసులకు అప్పగించారు. ఈ కల్తీ పాల సరఫరా నెట్‌వర్క్‌పై పోలీసులు లోతుగా దర్యాప్తు చేస్తున్నారు.