యునైటెడ్ కింగ్‌డమ్‌లో (యూకే) సుమారు 80 మిలియన్ పౌండ్ల (దాదాపు రూ. 1,020 కోట్లు) విలువైన కొకైన్‌ను అక్రమంగా రవాణా చేసేందుకు ప్రయత్నించిన కేసులో ముగ్గురు వ్యక్తులకు అక్కడి కోర్టు 47 ఏళ్లకు పైగా జైలు శిక్ష విధించింది. మెట్రోపాలిటన్ పోలీసులు సుదీర్ఘకాలం పాటు దర్యాప్తు చేసి ఈ భారీ డ్రగ్స్ రాకెట్ గుట్టురట్టు చేశారు. ఒక సాధారణ దొంగతనం ఫిర్యాదుతో మొదలైన ఈ కేసు, అంతర్జాతీయ డ్రగ్స్ ముఠాను పట్టించే వరకు వెళ్లడం గమనార్హం.

వివరాల్లోకి వెళితే.. 2021 నవంబర్ 26న నార్తాంప్టన్‌షైర్‌లోని లిల్లిపుట్ రోడ్డు వద్ద ఒక హెచ్‌జీవీ లారీ డ్రైవర్ తన కంటైనర్‌ను ఎవరో పగలగొట్టి కొన్ని వస్తువులు దొంగిలించారని పోలీసులకు ఫిర్యాదు చేశాడు. అయితే, విచారణ ప్రారంభించిన పోలీసులకు ఇది సాధారణ దొంగతనం కాదని, దీని వెనుక పెద్ద డ్రగ్స్ కుట్ర ఉందని తేలింది. మెక్సికో నుంచి సెప్టెంబర్ 30న బయలుదేరిన ఈ షిప్పింగ్ కంటైనర్‌లో స్టీల్ ఫర్నిచర్ విడిభాగాలు ఉన్నట్లు రికార్డుల్లో ఉంది.

బ్రిటన్‌కు చేరుకున్న తర్వాత లారీ డ్రైవర్ రోడ్డు పక్కన ఉన్న బర్గర్ వ్యాన్ వద్ద టీ తాగేందుకు ఆగారు. అదే సమయంలో లారీ వెనుక ఒక గ్రే కలర్ వ్యాన్ ఆగడాన్ని స్థానికులు గమనించారు. అందులో నుంచి దిగిన కొందరు వ్యక్తులు, లారీ వెనుక భాగం నుంచి పెద్ద ప్యాకేజీలను తమ వ్యాన్‌లోకి ఎక్కించుకుని అక్కడి నుంచి పరారయ్యారు. దీంతో పోలీసులు రంగంలోకి దిగి దర్యాప్తు చేపట్టారు. ఆ ప్రాంతంలో జరిపిన సోదాల్లో 18 పెద్ద బ్యాగుల్లో దాచిన 780 కిలోల కొకైన్‌ను స్వాధీనం చేసుకున్నారు. దీని విలువ అంతర్జాతీయ మార్కెట్లో 80 మిలియన్ పౌండ్లకు పైగా ఉంటుందని అంచనా వేశారు.

కేసు తీవ్రత దృష్ట్యా దీనిని మెట్రోపాలిటన్ పోలీసులకు అప్పగించారు. ప్రత్యేక బృందాలు రెండేళ్ల పాటు దేశవ్యాప్తంగా దర్యాప్తు చేసి, ఈ నెట్‌వర్క్ కదలికలను ట్రాక్ చేసి, నిందితులకు వ్యతిరేకంగా పక్కా ఆధారాలు సేకరించాయి. ఈ దర్యాప్తునకు నాయకత్వం వహించిన డిటెక్టివ్ ఇన్‌స్పెక్టర్ డీన్ గ్రాఫ్టన్ మాట్లాడుతూ.. “ఇది అత్యంత వ్యవస్థీకృత ముఠా పని. యూకే వ్యాప్తంగా కొకైన్ అమ్మి మిలియన్ల కొద్దీ పౌండ్లు సంపాదించాలని నిందితులు ప్లాన్ చేశారు. రెండేళ్ల పాటు క్షుణ్ణంగా దర్యాప్తు చేసి ఈ ముఠా గుట్టు రట్టు చేశాం” అని తెలిపారు.