మెట్రో న్యూస్:
భారతరత్న సర్ ఎం. విశ్వేశ్వరయ్య జయంతిని పురస్కరించుకుని రాజీవ్ గాంధీ వైజ్ఞానిక సాంకేతిక విశ్వవిద్యాలయం బాసరలో ఇంజనీర్స్ దినోత్సవాన్ని విద్యార్థుల ఉత్సాహం, విద్యా స్ఫూర్తి నడుమ ఘనంగా నిర్వహించారు. దేశ నిర్మాణానికి సర్ ఎం. విశ్వేశ్వరయ్య అందించిన అసమాన సేవలను ఈ సందర్భంగా స్మరించుకున్నారు. నూతన ఆవిష్కరణలు, సాంకేతిక పురోగతి, సుస్థిర అభివృద్ధి, సామాజిక పురోగతిలో ఇంజనీర్ల పాత్ర అత్యంత కీలకమని ఈ వేడుక చాటిచెప్పింది.
ఆర్జీయూకేటీ వైస్ ఛాన్సలర్ ప్రొఫెసర్ ఎ. గోవర్ధన్ ఈ సందర్భంగా శుభాకాంక్షలు తెలియజేశారు.
సాంకేతిక నైపుణ్యం, సామాజిక బాధ్యత, అంతర్జాతీయ పోటీతత్వం ఉన్న ఇంజనీర్లుగా ఎదగాలని పిలుపునిచ్చారు. విజ్ఞానాన్ని, సాంకేతిక నైపుణ్యాలను వాస్తవ ప్రపంచ సమస్యల పరిష్కారానికి ఉపయోగిస్తూ సమాజ శ్రేయస్సుకు తోడ్పడాలని సూచించారు. అడ్మినిస్ట్రేటివ్ ఆఫీసర్ ప్రొఫెసర్ ఇ. మురళీ దర్శన్ విద్యార్థులకు శుభాకాంక్షలు తెలుపుతూ, ఇంజనీరింగ్ విద్య కేవలం విద్యా నైపుణ్యానికే పరిమితం కాకుండా క్రమశిక్షణ, ఆవిష్కరణలు, నాయకత్వం, సామాజిక బాధ్యతలను పెంపొందించాలని స్పష్టం చేశారు. విశ్వవిద్యాలయంలో అందుబాటులో ఉన్న అవకాశాలను సద్వినియోగం చేసుకుంటూ నూతన సాంకేతిక సవాళ్లను ఎదుర్కొనేందుకు సిద్ధం కావాలని కోరారు.
అకాడమిక్స్, ప్లానింగ్ అసోసియేట్ డీన్ శేఖర్ శీలమ్ నిరంతర అభ్యాసం, వివిధ విభాగాల సమన్వయ ఆలోచనల ప్రాముఖ్యతను వివరించారు. తరగతి గది విజ్ఞానాన్ని ఆచరణాత్మక పరిష్కారాలుగా మార్చేందుకు పరిశోధనలు, ప్రాజెక్టులు, పరిశ్రమాధారిత కార్యకలాపాల్లో చురుగ్గా పాల్గొనాలని సూచించారు.
ఇంజనీరింగ్ అసోసియేట్ డీన్ డాక్టర్ కె. మహేశ్ మాట్లాడుతూ, ఇంజనీరింగ్ అంటే కేవలం సాంకేతిక చిక్కులను విప్పడం మాత్రమే కాదని, మానవ జీవిత నాణ్యతను పెంచే మార్గాలను అన్వేషించడమని చెప్పారు. ధైర్యంగా ఆలోచిస్తూ సవాళ్లను ఎదుర్కొని, వైఫల్యాల నుండి పాఠాలు నేర్చుకుంటూ సుస్థిర పరిష్కారాలను రూపొందించాలని పిలుపునిచ్చారు. సైన్సెస్, హ్యుమానిటీస్ అసోసియేట్ డీన్ డాక్టర్ ఎస్. విఠల్ శాస్త్రీయ పరిజ్ఞానాన్ని మానవీయ విలువలు, సమాచార నైపుణ్యాలు, సామాజిక స్పృహతో జోడించడం ముఖ్యమని అభిప్రాయపడ్డారు.
ఈ వేడుక విద్యార్థులకు సర్ ఎం. విశ్వేశ్వరయ్య ఆదర్శాలను పాటిస్తూ ఆవిష్కరణలు, సమాజ సేవ వైపు సాగేందుకు స్ఫూర్తినిచ్చింది. భవిష్యత్ సాంకేతిక నాయకులుగా ఎదిగే క్రమంలో “నేర్చుకోండి, ఆవిష్కరించండి, మార్పు తీసుకురండి” అనే సందేశాన్ని అందిస్తూ అకాడమిక్ విభాగం విద్యార్థులకు శుభాకాంక్షలు తెలియజేసింది.
ఈ కార్యక్రమంలో వివిధ విభాగాధిపతులు, బోధన, బోధనేతర సిబ్బంది విద్యార్థులు పాల్గొన్నారు.
